شعب الماتش الواحد

لم يحتاج الشعب المصرى الا لماتش واحد ليذوب عشقا فى علاء مبارك

ولم يحتاج الا ل 8 دقائق يتحدث فيها فى برنامج رياضى ليدعوه بعضهم لتولى رئاسة

الجمهوريه خلفا لولاده

وليجمع علاء فى صفحة محبيه على الفيس بوك 7650 محب

http://www.facebook.com/pages/-/181891125431?ref=search&sid=627236253.2295915830..1

بينما جمال يحاول مع ضباط امن الدوله منذ زمن لينجحوا فى النهاية تجميع 4417 مؤيد

http://www.facebook.com/group.php?gid=34195660615&ref=search&sid=627236253.56908991..1

انه حقا لشعب الماتش الواحد

وانا أدعم ابو تريكه ليكون رئيسا لهذا الشعب

إغتيال العقل

احنا زى الفل ولنا التاريخ والحضاره ومصر ام الدنيا وابوها

هذه هى البداية

بداية اغتيال العقل

عندما كان الماضى هو حاضرنا

بينما غفل مغتالى عقولهم وعقول مريديهم ان التطلع الى تقليد الغرب ليس نتاج الغزو المادى والفكرى الغربى الناتج عن تآمر بعض المثقفين وتخابث بعض المبشرين والمرتبطين بعلاقه وثيقه بالغرب

بل هو نتاج ضعف اصاب الحضارة العربية وفقدان واضح للثقافه المحلية وتدهور حدث للحضارات السابقة

هو نتيجة لفقدان المصداقيه والرابط بين الثقافه والمرجعيه وبين الواقع المغاير

ولذا الانتقال من الثقافه المحليه الى مجاراة الغرب ومحاكاتهم ماهى الا محاولة من الشعوب العربيه للبقاء والاندراج فى المدنية

بل ان متهمى اولئك بالتغرب أو التآمر او فقدان الهوية هم فى الاصل عندهم اذواجية
فكلامهم غير مطابق لواقعهم
مهما كانت بعض افعالهم لا تعكس ذلك

فمطمعهم فى تلبية رغباتهم ومطامحهم أقوى من ان يقفوا متبلدين فى تقليدهم
فالتغيير والنزوع الى مجاراة الحضارة الغربية ..أمر حتمى لا جدال فيه مهما حاول البعض الاستغناء عنه بالماضى وبالتقليد
ولا مجال لتوقف التقليد الا ببناء حضارة مدنية جديده اصلها حضارتنا القديمه وبناؤها حديث من طراز المدنية الغربية مغموسة فى قيمنا المفلترة.

اغتيال العقل يتم
باغتيال العلم
فالعلم اما مُجّرم أو مُحّرم او غير متاح

فالامكانيات المادية الهائلة التى يتم توفيرها لامن النظام لا يتم صرف 1/100 منها لتطوير العلم ليواكب الحضارات المتقدمه ولو نسبيا لنسير رجلا بكتف رجل احدهما يسبق احيانا واحيانا اخرى الاخر يسبق
فلا مجال لفكرة او خطوة او سنتا يتم دفعه لتجربة قد تنجح وقد تبوء بفشل طعمه نجاح.

فالعلم هو رأس الكمال وعنصر التقدم الاجتماعى والاخلاقى والمادى
وان تم بناء حضارة ماديه من عناصر طبيعيه بدون ان يكون اساسها او مصاحب لها تقدم فى العلوم البشرية والاجتماعيه
ستتحول الى غول مادى والى تراجع فكرى وتبلد سلطوى ووحشية طرح
كما حدث ومازال فى بعض دول الخليج

اغتيال العقل بالتطرف
فالتطرف والتطرف المضاد هو السمة السائده فى العالم الآن
وليس لهذا التطرف عندى من خيط بداية
فقد يكون تطرف غربى بنظرتهم العلوية للعرب مما جعلهم يعتقدون ان لهم الحق فى تحريكنا كقطع الطاوله معتمدين على ارقام عشوائيه
وكذلك توزيع اراضينا فيما بينهم سواء بالتراضى او باستخدام العنف
وليس ابلغ دلالة على ذلك اعطاء ارض فلسطين لليهود بما يتم وصفه دائما اعطاء من لا يملك لمن لا يستحق
وكذلك الغزو الامريكى الخليجى
والدعوة الشهيرة لبوش..من ليس معى فهو ضدى

وقد يكون التطرف تطرف عربى قابله تطرف غربى مضاد
بالجمودية وكره الاخر والتشكيك فى نواياه تجاهه
مع ان النوايا كانت بربرية عموما وكذلك الافعال
وهذا ظهر جليا فى الحروب المتبادله العالمية والتى شارك بها العالم الحديث لتدمير الاخر بطريقة بربرية

وقد يكون تطرف الحادى قابله تطرفا دينيا
فالكفار الجدد بعضهم لا يتوقف عن سباب اله الاخرين والذم فى رسلهم وعقائدهم مما يخلق كرها مباشرا ومغالاة فى رد الفعل تكبيرا للحدث وتصغيرا من متطلبات العصر الحديث مكتفيين بالمشاهده وتغذية تطرفهم

وقد يكون تطرف دينى قابله تطرف الحادى غشيم بادعاء التنوير وهو ابعد مايكون عن النور
فالكره هو سمته وان ادعوا الحب
والحقد هو اساسه ولو اظهروا العقل
والرجعيه هى المرجعية وان كتبوا على صدورهم التقدمية

لكن بعيدا عن فك هذا الاشكالية فاغتيال العقل سيكون حاضرا دائما مادام التطرف منتشر وموجود
ولن يعتدل الحال الا عندما يقف كل فرد من اصحاب الاتجاهات الفكرية المختلفه لينظر بداخله بعيدا عن نظرته المتطرفه للاخر
لنبذ التطرف من داخله واستبداله بتقبل للاخرين مهما اختلفت التوجهات ومهما كان فى وجهة نظر الاخر متطرف

بل وليصل به الامر للبحث والتفتيش فى ثنايا الاخر عن اى جوانب مشتركه وسيجد
ليكون الاعتدال سمة لبناء حضارة نهضوية تنويرية بحق
بدون شعارات وادعاءات زائفة

إغتيال العقل باغتيال الاخلاق

باسم العلمانية تارة..وباسم الدين تارة..وباسم الالحاد تارة وتارة وتارة
وقد ارتبط لفظ الاخلاق عند البعض بالجمودية والتقليد
وهو اتهام باطل
فالاخلاق اطار يبنيه المجتمع ليحمى ضعافه ويقوم نفوذه وجموحه ويثبّت المنظومة الاجتماعية لتسير باتجاه تقدمى واضح
وتعطى الفرد السبيل والمعرفه والقدره على الاختيار بين أمرين
وهى الاشكالية التى يعانى منها الكثير فى عالمنا العربى بشكل خاص والعالم أجمع بشكل عام
فمصلحة الفرد لا يُمكن ان تُبنى على مصلحة الجماعة والا تحولت الحضارة الى آلة تأكل بعضها بعضا من الداخل لتصبح جدارا هشا يسهل تحطيمه

وهذا الاغتيال له علاقه بالتعميم المنتشر
فهذا اسلامى يسب
اذ فالاسلاميون بلا اخلاق
وهذا علمانى يسب
اذ فالعالمانيون اصحاب تربية رديئة
وهاتين منقبتين تتشاجران فى الشارع
اذ فالمحجبات والمنقبات هن داء الاخلاق القويمه
وهذه بنت غير محجبه ترفع اصبعها الاوسط لاحدهن وتسبها بالفاظ يعاقب عليها القانون
اذ فالسافرات هن منبع الرذيلة

التعميم هو من اسس انعدام الاخلاق
بل هو من اسس البند القادم فى اغتيال العقل
وهو الانغلاق وعدم الانفتاح على الاخر

فاستغرب بشده وانا اقرأ مقالا او نوتا لملحد والقى نظره على اصدقائه الذى تم ادراجهم فى النوت فلا اجد الا ملحدين امثاله او قريبى الشبه به
مع ان حديثه متجه للاخر

وكذلك بعض مقالات الاسلاميين المتجه للاخر

واذا تم دخول احد مغاير يتم الرد عليه بعنف او جفاء او قلة أدب او بكل هذا
ليتم طرده

ولا اعرف لماذا اصلا كتب النوت؟؟
هل ليتم التصفيق له من اصحابه واحبابه وحزبه الفكرى؟؟

هذا الانغلاق يجعل الفكره الطيبه لا تتحرك من منبعها قيد أنملة
والافكار الرديئه لا يُحد انتشارها بالقاء بعض الاجابيات المشتركه بين الافكار والاحزاب الفكرية المختلفة.

اغتيال العقل لم ينجو منه الاسلاميون ولا العلمانيون ولا الملحدون

وعجبا فكل منهم يدعى التنوير
وهم ابعد مايكون عنه

وعندما يستطيع عقلاء الامة الحقيقيون ان ينتشلوا الحضارة العربية من هذا الاغتيال الواقع
سيكون ارتقاء العرب الى ان الحضارة لن تُبنى الا بالاعتماد على جميع الايديولوجيات المتاحة والافكار المطروحه وان الحضارة لن تبنى بمعول فكرى واحد او ايديولجية منفرده

لن تبنى حضارة ايها الاسلامى بدون الفكر العلمانى
ولن تبنى حضارة ايها العلمانى بدون سواعد اسلاميه
ولن ينعدل الحال بنشر الالحاد
ولن يكتسب الاقباط حريتهم بوصول قبطى الى الحكم

هذه البوتكة من الافكار ان اجتمعت تحت شعار الاعتدال وقبول الاخر وفى اطار علمى واخلاقى محترم
سيكون اغتيال العقل من الماضى

حــريـة

فوق سحاب القدر

تتناوب الغيوم لإخفاء السماء

ونور الشمس الساطعة قبل المساء

تناوب الجلاد على قلوب البشر

يرفع القلب قيوده

يتجه نحو الجنوب

حيث الرجال

والشجاعة

والحياة على قدر الاستطاعة

لكن فى الجنوب

الحرية قدر
__

نسائم الشمال الحزينة

تلمس القلب الطموح

والجنوب أمامه يأبى الخضوع

أو الركوع

يتناول القلب خيوط القدر

ليشد القيود

ويأبى الا العبور

نحو الحدود

حيث البراحة

براحة قلب لم يمت

ولن يموت

لأن الحياة فيه تأبى الخنوع

قلب حريته قدر

_____

يقطف القلب ورود بديعة

ليهديها للقيود

وتدخل الروح

بين مفاتيح قديمة

لتفك قيد قد غطاه الصدأ

صدأ الرقابة

والرتابة

والظلم ينخر فى الوجود

وجودى انا

وأنت

وروحى

وروحك

وقلبى

قلب حريته قدر

_____

فى الجنوب

تنسى القلوب معنى العبودية

لتقف على زبابة القلب

لتنظر على مد البصر

لا حدود

لا قيود

لا اساطيل ظلم وراء الغيوم

هنا فى الجنوب

تسطع الشمس لتملأ السماء بنور الصباح

على الكحال والملاح

وتلهو النسائم بين أغصان الشجر

لتخبر عنها

وعنى

وعنهم

أن الحرية قدر

لن يحرمنا منها بشر

شــوق الرجــوع

دائما ماتنتابنى هذه الاشواقُ الأثيرةُ فى أوقات السحرِ

وغولة الجسم هدها طول اليوم لتبقى الروح بحريتها ترفرف حول جسدى المُنهك

لتتغلب على ذنوبى وفلتاتى

وتتجه صوبه

بشوق الرجوع

وبقلب لا يبغى الا نوره

وجوارح غربّها البُعد

وببقايا ذِكرُ لسانٍ

اقول يــــــــارب

شـئ من الإستعبـاط

تُعانى البلد من حالات متقطعة من تلك الصفة الشهيرة التى تُدعى الاستعباط والاستعباط فى بلدنا الميمونة انواع فمنه الاستعباط الرسمى والاستعباط النص رسمى والاستعباط الربع رسمى والاستعباط الغير رسمى ومنه االاستعباط بتاع الكباره واللى تحت الكباره واللى مش كباره وطبعا الاستعباط قد يكون فرديا او جماعيا يتجلى الاستعباط ويظهر فى أبهى صوره فى اتحافات رئيس وزرائنا النظيف فى قوله (بقاء المسئول في موقفه لسنوات طويلة يهبط بأداء المسئول ويجعل من المفيد إعطاء الفرصة لوجه جديد) تعليقا على اقصاء وزير الرى السابق من الوزارة ولا ادرى هل وزير الرى استمر فى منصبه مثلما وزير الداخلية جاثم على صدورنا؟؟ او فاروق حسنى؟ او غالى ؟ وهل نسي سيادته سرور؟؟ وهل تناسى البيك بوس بتاع مصر الكُبّاره الكبير؟؟ فقط شئ من الإستعباط - ومن صور الاستعباط الاخرى الثانوية العامة بعد 4 سنوات ستصبح 50% أعمال سنه بالاضافة الى اختبارات قدرات لكل كلية وكان التأييد للفكرة من الكثير ولكن كان السؤال الأهم طيب والوااااسطة؟؟وتحكم المدرسين فى الطلاب وإجبارهم على الدروس الخصوصية؟؟ وكان الرد المُبهر لا خلاص المدرسين خدوا الكادر والقشية بقت معدن ومش هيكون فى مشاكل واسطة ولا دروس خصوصية فقط فاصل من الاستعباط تقوده وزارتى التعليم فى مصر المدرس بعد ماكان بيقبض 400 جنيه هيقبض 1000 جنيه يافرحتى لا خلاص بقا معاه المرسيدس!! والواسطة التى تملأ ساحات مصر فى جميع المجالات ستتحكم تحكما فعليا جزئيا وكليا فى اختبارت القدرات للكلية وخلاص سيصبح واقعا ابن الدكتور هيبقى دكتور..وابن العامل هيبقى عامل ولا عزاء للمُستعبَطين (بضم الميم وفتح الباء) ويستمر مسلسل الاستعباط لنرى جروب عشاق جمال مبارك على الفيس بوك لا والله ليه عشاق كمان؟ دا من امتى ياعم الحبيب منك له؟ والاكثر استعباطا ان نرى من ضمن الاسباب التى يسوقها -عشاق السيد جمال مبارك-التى تجعلهم يذوبون عشقا فيه ويرشحونه رئيسا اوحدا لمصر 1- أمانته المالية واحنا اصلا لا يستطيع احد او يجرؤ او يفكر انه يجرؤ أو يحلم إنه يفكر انه يجرؤ انه يسأل عن حقيقة ثروات الرئيس وعائلته المالكه 2-أن أهم ما يميزه دون غيره أنه قائد لثورة الإصلاح والتطوير داخل الحزب الوطنى انا مش فاكر امتى تطور الا من تنكيل الى تنكيل ومن تزوير الا تزوير يمكن قصدهم انه غير شعار الحزب ودهن الجدارن ابيض !! 3-علاقات جمال مبارك الخارجية الواسعة وأكيد يقصدوا بكلمة علاقاته الواسعه..علاقاته بعز وحديده وأما خاتمة الاسباب الاستعباطية 4-"كاريزما" جمال مبارك وانا فعلا اموت واعرف مين كاريزما دى؟؟ وهل هى مزة فحت عشان نرشح جمال لسواد عيونها؟ أحسن من هيفاء وهبى يعنى كاريزما دى؟ ولا هتطلع بت كسر وبيضحكوا علينا وهو مجرد استعباط والسلام؟!! وصور الاستعباط الحكومى لا تعد ولا تحصى فمنها منع عربيات النقل الثقيل من السير على طريق مصر اسكندرية الصحراوى فى " الويك اند " عشان الناس اللى رايحين يصيفوا والحوادث؟؟!! والاستعباط الاكبر ان وزيرى النقل والزراعه لا يعلموا ( حسب قولهم ) بالقرار او متخذه ومنه المدارس اللى بتتملى بالعيال لما يكون الوزير معدى والطرق اللى بتترصف وتتفحت تانى يوم والشجر اللى بيتزرع ويتشال تانى يوم والاستعباط الشعبى على قفا ميين يشيل ااى واحد ينزل اى سوق وهو يفهم الاستعباط على اصوله القميص اللى ب30 جنيه هيقولك انه ب 80 اصله تصدير قصده تصدير من عند الست امينه الخياطه والجزمة اللى ب60 هيقولك ب200 اصلها جلد تعبان وهى جلد فرخة عندها انفلونزا كمان وطبعا الأيمان المُغلظة جاهزة واللى عايز يشوف الاستعباط بحق وحقيقى يركب تاكسى ومش هحكيلك بقا هيستعبطك يعنى هيستعبطك وختام الاستعباط مسك ومش هعلق عليه فقط هنقله ليكم وانتم حسوووووا الاستعباط بقلبكم وعيشوااا الاستعباط اللى بجد فى حوار الرئيس مبارك مع التلفزيون المصرى ((((وعن اهتمام مبارك بمحدودي الدخل والفقراء ، قال "أقول لك بصراحة أن الشخص القادر يعرف طريقه أما الشخص غير القادر فيلجأ لى وأعطف عليه بشكل كبير.. فمثلا عندما أجد شخصا مريضا ، ففي إحدى المرات كنت في الإسكندرية بالسيارة وجدت شخصا بجوار سور مستشفى المواساة يجلس مع أبنه يبكى وبعد مرور السيارة عدت مرة أخرى وسألته ماذا بك؟ فقال أن أبنه مريض ولا يجد العلاج فى المستشفى ، فقلت لهم "سيارة تذهب معه إلى مستشفى مصطفى كامل للعلاج ويتابع منزله وما يحتاجه من أشياء" وساعدته بكل الطرق". وأضاف " أعطى لك أمثله أخرى.. فهناك شخص من كام يوم لديه أبنته أصيبت بمرض وأجرت عملية قبل ذلك ، وقالت لى والدتها انها ليس لديها نقود وكان زوجها مهندس فقلت لهم أعطوني الأوراق الخاصة بأبنتكم ، وتحدثت مع الدكتور حاتم الجبلى وزير الصحة وكان هذا مساء يوم الجمعة وقلت له خذ الأوراق وأدرسها ورد عليا الآن ..فقال لى أنه سيبحث عن مستشفى تعالج الابنة لكن العلاج لابد أن يكون بالخارج ، وفى اليوم التالى تحدث إلى الجبلي وأخبرني أن هناك مستشفى فى لندن وأخرى فى باريس ولابد من إجراء عملية يوم الأثنين وإلا سيكون الوقت متأخرا جدا، كما أن السفارات كانت مغلقة فقلت له أننى سأحاول فى الفيزا ..وكلمت رئيس الديوان وطلبت منه أحضار جواز السفر والبحث عن السفير ليطلب منه أن يفتح السفارة ونحصل على الفيزا وتسافر البنت يوم الأحد ، وبالفعل سافرت يوم الأحد ". ". )))) إنتهى كلامه وأتفقعت مرارتى وشكرا

عـمـل مـصــــــر

تاريخ مصر الكبير والعظيم
غريب شوية

الغرابة فيه انى مع دراستى للتاريخ فى ايام الدراسة ومع قراءتى لكتب ليها علاقة بتاريخ مصر
مفتش عليا ابدا ان مصر عاشت حياة ديمقراطية
ابدااااااا

يعنى احيانا كانت مصر عايشة فى نعيم والفقر مطرود من الابواب
والحاكم كويس وابن حلال
ايوة اكيد حصلت

بس برضو مفيش ديمقراطية

الفراعنة وسمعنا كتير جدا عن الفرق الكبير بين الاسر الحاكمة والكهنة وعامة الشعب
فرق فى المعيشة وفى المعاملة وفى المكانة وفى كل حاجه
واحاديث كتير عن بناء الاهرامات وماشابه الاهرامات بطريقة السخرة

ويمكن الزمن اللى وصل لينا اخبار كويسة شوية هو زمن بدايات العصر الاسلامى فى مصر
وقصة ابن عمرو بن العاص المشهوره عندما اختصمه شاب مصرى عند سيدنا عمر بن الخطاب وأمكنه من الاقتصاص من ابن سيدنا عمرو بن العاص
وقال وقتها سيدنا عمر مقولته الشهيرة
(متى استعبدتم الناس وقد ولدتهم أمهاتهم أحرارا)

لكن عموما اخبار العصور القديمة اكيد مش كلها وصلت لينا
ومنقدرش نحكم بالتفصيل
الا ان بالمجمل كانت مصر تقبع تحت حكم فرعونى زى الحكم دلوقتى كده

فى العصر الحديث حواديت نظام الحكم جديدة وطازة وفرش وممكن نتكلم عنها بثقة
الطبقية الرهيبة اللى حصلت فى مصر فى اواخر حكم اسرة محمد على واللى وصل لقمته مع اواخر عهد الملك فاروق
واللى اتكلم عنه ابراهيم عيسى فى مقاله " إنجى "
وهو بيتكلم عن الفيلم المشهور "رد قلبى"

والثورة كانت الحل والضباط ابناء الشعب بيرجعوا البلد لاهلها
ودا كان الحل الوحيد ان مصر ترجع للشعب وان برضو انجى تتجوز من ابن الجناينى
الثورة هى الحل

لكن الثورة جابت ناس اتحكموا فى الشعب وجلدوا ابو الشعب وبهدلوا ام الشعب
عادى خالص
الطبيعى بتاع حكامنا يعنى
واصبح فيه قوى عظمى متحكمة فى البلد
وضابط كان عنده عربية فيات كحيانه بأه عنده 3 عربيات مرسيدس
ومراته كان عندها محبس وخاتم بأه عندها 20 كيلو دهب على شوية الماظ وحاجات كده
والشعب متهم حتى تثبت ادانته
والسجون مليانه
والتعذيب على ودنه

وراح ناصر من غير مايحصل اى تطور غير اللهم ان كان ولاد الملوك بيتحكموا فينا وبيسرقونا
وبأه ولاد الضباط هما اللى بيتحكموا فينا وبيسرقونا

وجه السادات
ومحلك سر

فين الديمقراطية ياحاج سادات؟؟
مفيش ديمقراطية يابنى

حتى ان الطالب اللى قاله الفساد ياريس
طلع قليل الادب واحنا مش عارفين

وخلصت ايام السادات وكلمة الديقمراطية مش موجوده
ولسه زى مااحنا الكبار واكلين البلد ومتحكمين فى مصيرنا بدون اى بارقة أمل

وجه العصر المباركى
والوعود المباركه البراقه
واللى طبعا محصلش منها حاجه

وبقالنا اكتر من ربع قرن منعرفش رئيس غيره
فى ظل نظام حكم ملوش اى علاقة بالديمقراطية اصبح فيه التزوير مبدأ
أو عشان منظلمهمش هو كان مبدأ بس هما ثبتوووه وتبتوا عليه

ولسه السجون مليانه باصحاب الرأى والفكر والسياسيين المعارضين من كل شكل ولون
ولسه احكام القضاء بينفذوا اللى عايزينه واللى مش عايزينه كانه لم يكن

ولسه البلد واقفه
وابن الوزير بيطلع لاما وزير كبير لاما حرامى كبير
وابن الغفير لاما بيطلع غفير اد الدنيا لاما بيموت قبل مايشوف دنيا
والفقير بيزيد فقر والمسكين بيزيد مسكنه
والشحات بيكبر فى شغله وبيبقى شحات كبير

وماكفهمش اللى عملوه فينا
فحبوا يرجعوا تانى للنظام الملكى
وطلعولنا التوريث

عايزين يورثونا زى اى حتة ارض او عقار

وايه ياشعب؟
عمرنا ما وقفنا وقفة جامدة عشان ناخد حقنا
عشان ابن الرئيس وابن الوزير والوزير نفسه يكون القانون اللى بيطبق علينا بيطبق عليه

عشان يكون حلم اى مواطن انه يكون رئيس مصر حلم مشروع
مش حلم عقوبته عقوبة القتل الغير مشروع

عشان الفقير يلاقى امل انه يكون غنى من غير مايكون الامل انه يسرق
والشاطر يوصل للمكان اللى توصله ليه شطارته

عشان ننور بلدنا بعرقنا بحب وغيرة وعشق لتراب مصر ونيل مصر وحضارة مصر وتاريخ مصر
من غير مانكون متأكدين اننا هنشتغل وغيرنا هو اللى هيحصد نتاج شغلنا

ليه ياشعب مانرفعش كل شهر قضية على الحكومة نطالب بحقنا فى امر ما بتوكيلات من مليون مصرى
كل شهر نقولهم لا احنا عايزيين حقنا

ليه ياشعب مانقولهمش لاما حريتنا
لاما السجن جوا مايفرقش عن السجن برا

ليه منكتبش بدمنا مش عايزينكم مدام انت الحاكم والسجان

او لو فعلا مفيش امل ان الشعب مره يقف عشان ياخد حقه بكل طريقة سلمية ممكنة

يبقى مفيش أمل غير فى السحر والشعوذة واللى مصر عايمة عوم دلوقتى عليها
والشعب غرقان لشوشته فى عمل الاعمال وفكها

ونؤمن كلنا ان مصر ماشفتش ديمقراطية طول عمرها
عشان معمولها عمل
وندور على السحرة والمشعوذيين عشان يفكوا عمل مصر

واشتات اشتوت يامصر

لو مصر هى أمى إمال ابويا فين؟

السؤال دا شاغل بالى وبال ناس كتير اكيد
عشان كده حاولت اعمل دراسات عشان ادور على ابويا

ماهو مش معقول يعنى اكون عارف امى ومكونش عارف ابويا
ومش معقول طول عمرى الناس تنادى عليا باسم امى وتقولى يابن مصر

تتبعت تاريخ علاقات مصر اللى المفترض انها امى
لاقيت انها كان ليها علاقات كتير
كتييير فعلا

عملت علاقات مع الهكسوس
فيمكن يكون ابويا هكسوسى

وعملت علاقات مع بلاد فارس وبلاد الروم
فيمكن يكون ابويا ابيض ومناخيرة حمرة

وعملت علاقات مع الفرنسيين
ومش متاكد لو كان ابويا نابليون ولا حد غيره

غير علاقتها الطويلة مع الانجليز

واكتشفت ان موضوع البحث عن اب شرعى وزوج شرعى لامنا مصر كان موضوع شغل بال النخبة المثقفة فى مصر على مر العصور

ووقعت ايدى على بردية قديمة جدا
ترجع للاسرة سالب واحد بتوصف اعتصام الصحفيين القدامى امام مسلة الصحفيين اللى بنوا مكانها النقابة فى العصر الحديث

وكانت مطالبهم ان مصر تعترف ليهم وتعرفهم مين اللى عمل العمله المهببه دى
وكان النتاج احنا بدون حولا منا ولا قوة

وكان من ضمن البيان اللى صدر منهم
" يامصر اعترفى واحنا هنخليه يكتب عليكى وحياة رع"

وفى اخر البردية بيحكوا عن ازاى الاعتصام انفض تحت قبضات الامن الفرعونى الملثم بالسواد
وتم اعتقال بعض من كتاب البرديات القصيرة

وتتبعت المحاولات المتعاقبة لمعرفة جوز مصر وابونا
وكانت النتيجة اللى وصلت ليها واللى برضو وصل ليها كل من بحث فى الموضوع دا من قبلى

اكتشفت ان مصر كانت متعددة العلاقات
دايرة على حل شعرها يعنى
وانها نفسها متعرفش مين ابونا

يانهار ابيض
يعنى ممكن يكون الناس وهما بيقولولى يابن مصر قصدهم انهم يعايرونى بامى؟؟

بيقولوا يابن مصر ويغمزوا لبعض من تحت لتحت؟؟!!

لا لا عفوا جدا لحد كده وبس
أحب اعرفكم
مصر مش امى ولا حاجه

مصر هى خالتى
وتحيا مصر

ولاد الحرام مخلوش لولاد الحرام التانيين حاجة

دايما كان ولاد الحرام مش بيخللوا لولاد الحلال حاجه
بس الايام اللى فاتت بدأ يصعب عليا الحرامية جدا
خلاص هيسرقوا مين؟؟

هيسرق الموظف اللى بيقبض 300 جنية فى الشهر ؟؟ وإزازة الزيت ب 15 جنيه ؟
ولا هيسرق الشاب اللى مجمع 10 آلاف جنيه شغل 3 سنين عشان يشترى شبكة لحبيبته اللى اهلها مش راضيين بشبكة أقل من 15؟؟

حتى الناس اللى معاها فلوس دلوقتى عامليين إقفال وترابيس وحاجات الكترونية متطورة متخليش اى حرامى غلبان يعرف يفش قفل ولا يخلع كالون

الدنيا بأت ناشفة اوى على الحرامية من الاخر... ناشفة اخر حاجه يعنى

بس ولاد الحرام الكُمل الكبّاره ... شغاليين على ودنه
والكلام انهم هما اللى نشفوها على الحرامية الصغيرين

اهو الحرامى الصغير كان بينشله 20 جنيه من جيب واحد
بيسرق تلفزيون من شقة واحد
موبيل من واحد قاعد جنبه فى المواصلات

بس الكُبّاره .. بيسرقوا من كل بيت رقم ثابت كل شهر رسوم نظافة فى بلد آخر حاجه ممكن نوصفها بيها انها نظيفة
الكُبّاره..بيشدوا ربع جنية من كل خرم إبرة ممكن يعدى منه شلن

بس ولاد الحرام فعلا خربوها ومخلوش لاى ابن حرام غيرهم حاجه
بالقرار الجامد لاتحاد الحراميين بان كل واحد يطلع بطاقة رقم قومى جديدة كل 7 سنين

يعنى تقريبا 1.5 مليار جنية كل سبع سنين ..سرقة بالقانون
وقال ايه..عشان تجديد البيانات

ايون ..عم اسماعيل من سبع سنين كان عنده الربو بس
دلوقتى عنده الربو والكبد والكلية بتاعته بتفكر تقف

والاستاذ محمود..كان ابنه الكبير فاشل فى المدرسة اللى مفهاش تعليم
دلوقتى ابنه الصغير هو كمان فاشل فى المدرسة اللى مفهاش تعليم

والواد كريم..كان فى سنه اولى هندسة
دلوقتى فى أول مرة 2 هندسة بعد إعدادى

وابراهيم اللى بيشرب سجاير
دلوقتى بيشرب حشيش وبانجو

ايوة بعد سبع سنين حياتنا بتتقدم بينا..وبتتغير بينا
زى شعار الحراميين

وتحيا مصر

قراءة لدور مصر الهام...المحتضر

دائما وابدا منذ صغرى اسمع تصريحات الرؤساء والسفراء والحكومات الأجنبية بتعظيم دور مصر ومكانتها بمقولة شهيرة
" لدورها الإقليمى الهام"

وإيمانا منى بأن التاريخ لا يصنع أدوارا مهمة فى علاقات الدول فى عصرنا الحديث كان لزاما على أن أفتش عن دور مصر الذى يجعلها من الدول الهامة فى الشرق الأوسط

لا نملك بترولا ولا أسلحة نووية ولانملك إقتصاد قويا يُحاكى اى اقتصاد دولة متحضرة فى العالم

وماكان يميزنا عن باقى الدول العربية من ثراء او إمكانيات إنتاجية او زراعية إندثر مع الزمن فى ظل صعود أسهم البترول وإكتشافاته المتلاحقة فى دول الخليج بجانب اندثار المجالات الزراعية المميزة لمصر من قطن وقمح وغيره

ولم أجد مايميز مصر الا كونها " كبيرة العرب"
نعم فهى من ساعدت فى الماضى والحاضر الحكومات والدول والشعوب العربية للتطوير والتحديث والخروج من الأزمات
بل والتغيير الشعبى والثورى

وتعرض الدور المصرى فى المنطقة لهزة عنيفة كادت أن تفقده صلاحيته مع اعتراف مصر باسرائيل واتفاقيات كامب ديفيد
ولكنه تعافى سريعا باتجاه الحكام والملوك العرب تباعا الى طريق مصر سواء بطريقة ظاهرة أو خفية

وأصبحت مصر هى اللاعب الاساسى فى المنطقة
فهى الدولة المعتدلة صديقة الغرب
وهى الدولة العفية الرائدة صديقة العرب وكبيرتهم
وهى من تمسك العصا من المنتصف بعلاقات متوزانه مع مايسمى بدول الحياد

وتابع مُبارك هذا الدور من بعد الرئيس السادات
فكانت السياسات الخارجية تتسم بالتوازن والعقلانية فى معظم الأحيان وهذا ما خلق قبولا خاصا لوزراء الخارجية المصريين فى مصر والعالم العربى وكان أكبر شاهدا على ذلك عمرو موسى الأمين الحالى لجامعة الدول العربية

ثم تحول الأمر بطريقة مُفاجئة فأصبحت مصر بعدما كانت تتعامل مع جميع الدول العربية والمنظمات القومية بنفس الطريقة وعلى نفس الخط بغض النظر على موافقتها لمنهجها ام لا
الى وقوفها بجانب ضد جانب اخر ومع فريق ضد فريق آخر فى تصغير كبير لدورها المحورى فى المنطقة


أمريكا والعالم الغربى
لا يحتاج مصر فى شئ الا هذا الدور المنوط بها من تجميع الفرقاء سواء كانوا اعداء او اصدقاء امريكا والغرب

يحتاجها لانها من تخاطب عدوها وعدو اسرائيل اللدود حزب الله..او المقاومة والشارع الفلسطينى
هى من تستطيع أن تجمع سوريا مع اسرائيل على طاولة واحدة
او تقنع الشارع العربى بتسوية ما

لان مصر لها مصداقية خاصة من دورها السابق والحالى

تهاوى دور مصر بدرجة عنيفة بعد حرب العراق وكان رد الفعل لا يتساوى مع دور وحجمها الكبير بغض النظر عن ردود الأفعال العربية الاخرى خاصة مابينهم وبين صدام من بحور دم

ثم تهاوى أكثر حين ضُحى بصدام فى أضحى المسلمين المبارك

ثم تهاوى للحضيض إبان حرب 2006 فى لبنان ووقوفه ضد حزب الله صراحة وتحميله مسئولية الحرب باتهامه له بالمغامرة غير المحسبوة

وتهاوى أكثر عندما تهاوى مثلث التضامن العربى المصرى السورى ومعهم من بعيد السعودى

تضامن بفجوة غير مقبولة بين سوريا التى أصبحت مكروهه امريكيا فأصبح ومصريا ايضا

وبعدها مُباشرة كانت هذه المعاملة الباردة من بوش لحكومة مصر ورئيسها فى زيارته للمنطقة والتى افرد فيها لمصر وقتا لا يتعادى الثلاث ساعات فقط

وفى مفاوضات المعارضة والموالاة فى لبنان كان الأثر لتهاوى دور مصر واضحا
فمصر ليس لها دور
فلن تقبل بدورها المعارضة وهى من أيدت الموالاة جهارا نهارا وعلنيا سواء كانت على حق او لا
ولكنها تتماشى مع الأجندة الغربية والتى أصبح حكومة مصر تتماشى معها غالبا
وأخذت هذا الدور دولة قطر مع صغر حجمها ومكانتها

وتقازم الدور المصرى ووضح مدى تقازمه
الى ان احتاجه الغرب مرة ثانية فى ظل وجود حكومة حماس فى غزة وهى الحكومة المرعبة لاسرائيل لانها تتخذ من المقاومة خيارا استراتيجيا

فكان هذا الدور المصرى الذى قارب ان يخسره ايضا لصالح فرق أخرى بتأييده العلنى لفتح ضد حماس وتحميله حماس مسئوليات كثيرة فى تصريحات هزلية لرئيس يصدر النكات السخيفة وفلاحا له يشغل وزير خارجيته لا يصلح الا للعمل فى الغيط الذى يملكه

واعادت مصر خطئها فى وقوفها بجانب ضد آخر ضاربا عرض الحائط بكونه هو الذى يجمع ولا يفرق وضاربا رأى الشعب الفلسطينى والعربى عرض الحائط

ومن قبل أن أدخل فى رأيى فى سبب هذا التضاؤل الغريب والغير مقبول فى دور مصر وكأننا نشهد أقزاما سياسية تتعامل مع القضايا الكبرى
أذكر
بأن بدون هذا الدور المصرى ستكون مصر دولة بدون اى قيمة او وزن فى العالم كله
غربيا وعربيا وعالميا

فهى ليست السعودية صاحبة رؤوس الأموال وحقول البترول
وليست سويسرا صاحبة البنوك والإقتصاد
وليست البرازيل بثرواتها الانتاجية الكبيرة
وليست الهند بصناعتها المتطورة
وليست روسيا بترسانات اصلحتها المتطاولة

ستصبح مثل غينيا وغانا وكينيا ودول الكوالالمبور

ليس هناك اى مصدر قوة لها

ونرى ذلك بوضوح فى المظاهرات التى عمت الدول العربية كرها لحكومة مصر وتنديدا بمواقفها وهى التى كانت دائما تثنى على دور مصر الريادى فى المنطقة


عندما أبحث فى هذا التقازم البغيض
ارجع الى أجندة حكومة مصر الداخلية

فمع بدايات ظهور وسطوع نجم جمال مُبارك فى مصر وزيادة النغمات المتحدثة عن التغيير
بدأ هذا التقازم فى الدور المصرى فى الظهور

ومع ازدياد الضغوط الأمريكية والغربية "الغير بريئة" للاصلاح الداخلى فى مصر
زاد تقازم الدور المصرى اتباعا للغرب وبُعدا عن الشارع العربى مصدر قوته
ليتغاضى الغرب والأمريكان عن وضع الحريات فى مصر وهو الموضوع الغير مهم حقيقة بالنسبة لهم ولكنه فقط وسيلة ضغط ممتازة على النظام المصرى

وظهر هذا جليا فى انتقاداتهم الاخيرة الحادة لمصر بسبب سجن أيمن نور و فى نفس الوقت لتهريب الاسلحة عن طريق الأنفاق الى غزة

ومع انصياع مصر للاوامر وفتح حدود مصر للامريكان للمراقبة والتدريب وبدأها تفجير يومى للانفاق وحصار غزة حصارا خانقا

تخافت ثم تلاشت الاصوات المنادية والمؤيدة للافراج الفورى عن نور

فاصبحت مصر تنصاع للطلبات الغربية فى الأمور الخارجية
ليتغاطى الغرب والأمريكان عن الأمور الداخلية

وكان من ضمن الأمور الخارجية استعداء حزب الله وحصار غزة وتجريم حماس والفرقة والاختلاف مع سوريا
وأصبحت مصر صغيرة مع الصغار
مع فريق عربى بما يسمى بدول الاعتدال وفى شبه خصومة مع فريق اخر لا يتسم بالاعتدال على الطريقة الأمريكية

وهذا كله خادما لمشروع التوريث فى مصر واستجداء لرضا امريكا والغرب واسرائيل على وصول الإبن ليحل مكان الأب وهو ما سيسهل قبول العالم لذلك وفرض ذلك على الداخل المصرى بالقوة الجبرية التى تعود الشعب وتعود النظام علي استخدامها

وقد أشرف مبارك على تأمين رضائهم على تولى ابنه الرئاسة بالفعل

لكن هذا يحدث على رُكام دور متهاوى وكبير أصبح صغيرا وأحيانا متواطئا
يفقد بعده ومكانته العربية التى تمدنا بقوة لا نملك من مصادر القوة غيرها

وقد تنتهى بنا الى أن نصبح حملا ثقيلا على كاهل الغرب وامريكا تُريد أن تتخلص منه
وعندها سيصبح عندنا اسلحة دمار شامل مشبوهه
وسيلزم على دول العالم حصارنا
وستعادينا دول الاعتدال الجديدة
والتى ستضم السعودية وسوريا وقطر
وسنكون نحن والسودان دول التطرف

اصل فى نهاية المقال لأمرين

مطالبتنا المستمرة بدخول مصر بدور فاعل وهام وقوى فى الصراع الاسرائيلى الفلسطينى القائم هو فى مصلحة مصر فى الدرجة الأولى لان مصر هى أكثر الدول المستهدفة
ولا أعنى بدخولها اى ان تحارب
ولكن هى تملك من الاسلحة السياسية والمواد الدبلوماسية الكثير ليكون لها دور يتساوى مع مكانتها المتعارف عليها

وأحذر ان لو انتهى عصر المقاومة العربية فى لبنان وفى فلسطين
وانصاعت للغرب واسرائيل
سيكون مصر دورها انتهى وستكون هى كبش الفدا القادم

ولذا دعم المقاومة عند الاسلاميين دين
وعند اليسار العاقل وطنية