بما انى من الناس اللى بتحب حبيب الملايين...ريسنا مبارك
انا واحد من الملايين دى
ومستحيل اصدق ان الرئيس بتاعنا ممكن يحاكم صحفى عشان معارض لسياسته
فانا عارف سعادته سعة صدره تسع الأفاق
وطبعا كلنا شفناه وهو قاعد مع المخبر...قصدى الفلاح ابن المحظوظه فى الحملة الدعائيه فى انتخابات الرئاسة
اى نعم مشفنهوش قعد معاه تانى
بس عادى يعنى....مش فاضى الريس يعنى عشان يقعد مع الفلاح ابن المحظوظه كل يوم
فالريس حبيب الملايين
كلنا بنحبه...وكلنا بنقدره....وكلنا عارفين ان مفيش اوسع من سعة صدره الا اللهم سعة المحيط الهادى
فعشان كده مستحيـــــــــــــــل اصدق ان الريس هيحبس الصحفين عشان بيعارضوه
دماغى لفت حقيقه المرة دى
طيب ياترى ايه السبب؟؟
مش لاقى حجه اتحجج بيها ذى كل مره
وبعدين اتخبطت بفكره نبيه فى مخى النبيه...وشععت فى دماغى وونورت نفوخى
فكرة جت فى بالى من كلمتين سمعت صداهم...وصحابهم بيداروهم
الريس.....بيؤمن بالفال
مفيش غير كده
اكيد الريس وهو ماشاء الله فى عز شبابه
لقى ان الكلام عن صحة سيادته...فال وحش
ولو ساب الناس المره دى تفوّل عليه
يمكن المره اللى جايه تقع الطوبة فى المعطوبة
والفال يبقى حقيقه
ونروح فى الرجلين
اسم الله عليك....الشعب كله فداك ياريس
مش الشعب بس
مصر بنيلها مش الملوث ياريس...لا بعد التحلية
وبترولها وغازها الطبيعى ...مش اللى بيروح لاسرائيل ياريس...احنا مش هنزعل الناس منك
وعيشها الابيض والملدن والفينو..مش اللى فيه مسامير ياريس
وبيضها الاحمر والبلدى وفراخها وكتاكيتها...مش بتاعة انفلونزا الطيور ياريس
حتى الكبارى والطرق ياريس....مش اللى فيها مطبات ياريس
وناسها فداك ياريس...مش اللى عندهم فشل كلوى ياريس ولا كبد ياريس..ولاعندهم بلهاريسا ياريس
ولا اتعذبوا مره ياريس
الناس اللى عايشين كويس ياريس
من خيرك ياريس
وصحتهم حديد ....بس طبعا مش ذيك ياريس
كل حاجه حلوه فى مصر فداك ياريس
كله فداك ياريس
احبسهم ياريس
فى داهيه اللى يفوّل عليك
ومتخفش ياريس
كلنا ماسكين فى الخشب
