الأمر أخد مني وقت طويل عشان أوصل لهذا القرار
كنت إقتنعت ب " لأ " ثم رجعت إقتنعت ب " نعم " ورجعت تشككت تاني وقربت من " لأ " ثم إستقريت على نعم .
نـــعـم ليـــه ؟
أي حديث عن إن لأ تساوي دستور جديد و نعم تساوي دستور مرقع .. دا كلام عاطفي وغير حقيقي
لأ و نعم تساوي دستور جديد , والإختلاف هو إختلاف آليات وضع الدستور الجديد
آلية وضعه بعد " نعم " هي الآلية الأكثر وضوحا ..والقوى السياسية اللي خايفه من تشكيل اللجنة بهذه الطريقة اللي جايه عن طريق الإنتخاب .. بالإضافة لعدم ثقتهم في نفسهم و إنهم عاملين زي واحد ساقط فعاوز يسقط كل الناس معاه .. خايفين من حاجتين :
1- سيطرة الإخوان على اللجنة
2- وجود فلول الحزب الوطني
والنقطتين دول لا يمسوا عقلي تماما
الحزب الوطني و فلوله أضعف كثيرا فعليا الآن من أي تصور
يكفي إننا نعرف إن الشخص دا قد يكون ليه علاقة بالحزب الوطني أو أفكاره ويكون أمر كافي انه ياخد كحكة كبيرة
ولو حصل وعدى حد منهم من الرسوب الكبير .. هيكون عدد قليل جدا
خصوصا إن الجهاز الأمني المنهار هو كان السبب الأول والأساسي لنجاحهم
بلطجة .. منع الناخبين .. تسويد بطايق ..قوائم إنتخابية مضروبة
والحاجات دي كلها إنتهت وأصبحت ماضي
فمقومات النجاح عندهم قليلة جدا تصل لدرجة الإنعدام
وسيطرة الإخوان مش هتحدث لأن نسبتهم معقولة
غير إنهم بيطالبوا بإئتلاف بين جميع القوى السياسية عشان يكون برلمان إئتلافي يُمثل جميع القوى السياسية
تلك القوى اللي مش هتكون جاهزة للإنتخابات ولا قبل 4 سنين
والإئتلاف دا هيحافظ على حالة الثورة من التشتت الآن في جو التنافس الشديد
وشايف دا عين العقل
وفي النهاية الدستور الجديد هينزل للتصويت الشعبي.. الشعب اللي القوى السياسية لسه لحد دلوقتي مانزلتش الشارع تكلمه ولا بمؤتمر واحد يوحد ربنا ! وكأنهم لو نزلوا الشارع هيتوهوا.
الدستور مش هيسرقه حد ..لأن اللي هيصوت عليه هم المصريون .
- المستشار زكريا عبدالعزيز قال في مجمل حديث رفضه للتعديلات جملة إستوقفتني كثيرا
قال " إن التعديلات كان لازم يكون بعدها مش أقل من شهرين لمناقشتها قبل الإستفتاء " ولقتني مضطر أفتح بوءي وأقول .. شهرين ؟؟
طيب لو التعديلات محتاجه شهرين يبقى الدستور كله محتاج أد ايه لمناقشته ؟
دا غير أصلا وقت مناقشة الآليات الأخرى لوضعه غير الآلية المعروضة الآن
إحنا بنتكلم في وقت طويل جدا, في ظل قلق على الأقل شخصي من تغير وجهة نظر الجيش و تحت ضغط شعبي كمان إنه يتولى الحكم أو إنه يعمل إستقرار بأي شكل ولو غير ديموقراطي
أنا قابلت ناس كتير زهقوا و طهقوا وبيلعنوا في أبو الثورة .. زمان كنت بحاول أفهمهم إن الصبر و إن و إن
بس دلوقتي هو فعلا في آلية واضحة لنقل السلطة الى نظام مدني يشارك فيه الجميع .. ونخلص من حكم العسكر ومن سخط بعض أو كثير من الناس
السخط اللي هيزيد في الأيام القادمة بلا شك .. خصوصا إن الإحتجاجات الفئوية طلعت عين ناس كتير
والمواد اللي هيحصل عليها لغط يصل بمجموعات من الشعب للإعتصام والتظاهر كتيرة .. و دا هيكون محتاج حكم مدني أكثر من حكم عسكري ليتعامل مع الأمر
دا غير إن علاقة الجيش بالنشطاء السياسين آخذة في التدهور
و حكاية النزول للتحرير بملايين تاني حكاية مشكوك في نجاحها جدا !
طيب هو إيه بقا ؟
ما نعمل إئتلاف و ندخل الإنتخابات ونضع دستور جديد في ظل ظروف أحسن
وينزل إستفتاء !
ايه المشكلة بقا ؟
_____
على الهامش
__
ضحكني واحد صحفي ليه اسمه جدا امبارح
قال إيه : الجيش ماشي ورا رأي الإخوان !
لا يا اخي قول كلام غير دا !
__
من الحاجات اللي مخليه الناس " اللي بتتحقق بجد " متردده جدا
إن كتير من أسباب أو رفض القوى السياسية غير معلنة
__
لحد دلوقتي شايف إن الشعب نسبة نجاحه في إختبار الديمقراطية الاول مرتفعة ... ونسبة نجاح القوى السياسية متدنية جدا
إستخدموا الترهيب و التخويف وإشتغلوا على العاطفة أكتر من العقل .. حتى لو كان بإيحاءات كاذبة
__
أسائني جدا دعوة البعض للنزول للتحرير يوم الجمعة لرفض التعديلات .. طيب واللي موافق وعاوز ينزل يروح فين؟
مصطفي محمود ؟
مادام الأمر وصل للصندوق يبقى خلونا نشتغل لإقناع الناس ..
التحرير دا ننزله لما نكون متفقين على رأي
مش ننزله عشان نتخانق
__
دي أول مرة هيكون صوتي ليه قيمة .. عشان كده لازم نفكر كويس و مانمشيش ورا القطيع .. سواء نعم أو لأ
__
عندي إيمان و يقين بإن النتيجة يوم السبت بغض النظر عن نوعها .. هتكون لصالح مصر
No comments:
Post a Comment