صوتك الآن فعلا مهم , و مصر كلها مستنية صوتك , صوتك ممكن يرجح كفة على كفة , عشان كده فكر كويس و قرر وإنزل بعدها إدلي بصوتك
مش المهم إنت من مؤيدي نعم أو من المعترضين و بتقول لأ
المهم إنك تنزل تعبر عن صوتك
وماتخافش ..!
ماتصدقش حد بيخوفك من إن صوتك ممكن يودينا في داهية لو كان غلط
في الديمقراطية مفيش غلط ...! مادام الإختيار حر يبقى هو الصح
لو قلت نعم مش هنرجع 50 سنة ورا ولا حاجه.. وهنمشي برضو في الإتجاه الصحيح
ولو قلت لأ .. الدنيا مش هتخرب .. و البلطجية مش هيقتلونا في الشوارع
ماتخليش حد يخوّفك .. لأن النخبة اللي بيكلمونا أكثرثم نجاحا هو ساقط بالثلث..إلا نسبة قليلة جدا منهم
الشعب و الثوار .. ما استنوش ياخدوا رأي النخبة دي أيام ثورتهم .. ولو إستنوهم كان إحتمال فشل الثورة كبير.
الشعب ثار وساق النخبة وراه
النخبة فعلا طول عمرها لما بتحاول تسوقنا بتكون سواقة خايبة وإنتهازية !
سوقهم إنت بفكرك الحر وإنزل إدي صوتك بغض النظر عن النخبة بتقول إيه.. أو غيرهم
لو إنت إسلامي .. مش لازم تمشي ورا رأي الإخوان لو ما اقتنعتش بيه
و لو إنت علماني مش لازم يكون رأي البرادعي أو أيمن نور مُقدس
ولو إنت مسلم .. رأي الشيخ لا يمثل إلا وجهة نظره الشخصية فقط
ولو إنت مسيحي .. الإسيس بتاعك رأيه برضو لا يمثل إلا وجهة نظره
ماتخليش حد يسوقك .. و سوق إنت نفسك بنفسك
قول رأيك .. وماتتنازلش عن حقك دا أبدا.
______
مابعد الإستفتاء
______
بعد الإستفتاء في نتيجة سواء " نعم " أو " لأ
لما تطلع النتيجة.. لازم تحط نقطة فورا وتبدأ تبص لمرحلة ما بعد النتيجة المُعلنة
صاحبك .. أو جارك .. أو الناس اللي قالت رأي عكسك والشعب مااخطارش رأيهم
ماينفعش نقضي اليوم سخرية منهم
ماينفعش شباب القوي السياسية المختلفة تعاير بعضها بإن رأيهم سقط
ماينفعش نرجع تاني للتخوين .. و الإتهامات بالعمالة .. أو غيرها !
ركز إن كل واحد بيشوف الإصلاح و الخير من منظور إقتناعه الشخصي
وإن دا حقه تماما
بس كل المصريين و كل القوى السياسية بالتأكيد عاوزه الخير لمصر
الطريقة فقط هي المختلفة
خليك منتصر مُتحضر
و لو نتيجة الإستفتاء طلعت ضد رغبتك
ماتقولهمش يخرب بيوتكم خربتوا البلد !
البلد مش هتخرب برأي حر إتقال في صندوق شفاف و في إنتخابات " أو إستفتاء " نزيهة
ما تقولهمش بكرة تندموا ! لأن إن شاء الله محدش هيندم
وبرضو ما تخدش جنب و تقفل عليك الباب وتخاف تواجه الناس وإنت حاسس بالهزيمة !
أبدا
إنت إنتصرت لما نزلت وقلت صوتك وبقيت إيجابي
اليوم دا .. محدش فينا هيخسر
كلنا كسبانين...!
إنت مُنتصر حتى لو النتيجة مش زي ما كنت عاوزها
______
أمنيات شخصية ورؤى
______
أول مرة يكون في حشد إعلامي رهيب لوجهة نظر ما زي ما بيحصل دلوقتي
و قد يكون دا مش عادل أوي
لكني مستمتع بيه !
مستمتع عشان كل القوى السياسية هتعرف تأثيرها الحقيقي
بس أحب أقول للأحزاب القديمة ... معلش هو تأثيركم ضعيف جدا .. وقد يكون سلبي كمان
أنا بتكلم عن القوى السياسية الجديدة نسبيا .. والنخبة الغير مُلوثة نسبيا
والإخوان !
الإخوان كانوا بينجحوا في الإنتخابات بحاجتين ! فكرهم والناس اللي بتؤيده
وأيضا إختيار أشخاص محبوبين في دوائرهم
الفكرة التانية مش موجودة دلوقتي .. لأن كل الحشد الآن لفكرة وليس لشخص
الإخوان هيعرفوا تأثيرهم الحقيقي في الإستفتاء دا
لأن قد يكون 50% على الأقل من اللي هيقولوا نعم متأثر بالفكر الإخواني أو الإسلامي عموما
لو النتيجة طلعت لأ
هتكون سعادتي محصورة في بضعة أشياء
منها إن القوى السياسية - غير الإخوانية - قد تستغل الفرصة و تثق في نفسها بعض الشيء
وتبدأ على هذا الأساس تنزل الشارع و تشتغل شغل سياسة صح ..
بس أنا مقتنع ب نعم
ولو الشعب قال نعم .. رسالة للإخوان والإسلامين :
" ما تخدوش مقلب في نفسكم "
لكن في كل الاحوال هكون سعيد
سعيد بالتجربة .. وسعيد بالإيجابية
و اللي بتمناه فعلا إن يكون رد فعلنا بعد الإستفتاء محترم وراقي
آخر أمنية
بتمنى من كل قلبي إن تظهر وجوه سياسية جديدة أكثر شفافية و ضمير
لأني فعلا قرفت من الوجوه القديمة اللي عاشت طول وقتها تشتغلنا
وفي الآخر بكرر
مش مهم تقول نعم .. و مش مهم تقول لأ
المهم تنزل .. وتقول
No comments:
Post a Comment