زقزق يُزقزق زقزقة فهو مُزقزق
عندما تكتب تلك الحروف
T w i t t e r
فادخل برجلك اليمين في دنيا الزقزقة الإلكترونية
و قبل ما تفتح بوءك و نظرة البلاهة تقفز إلى عينيك و تقول بصوت مبحوح : هو البتاع دا بيشتغل إزاي ؟
هقولك : يا صديقي متصدعناش و روح جوجل إعمل سيرش هتلاقي مليون توبيك و نص بيقولك البتاع دا بيشتغل إزاي .
عرفت ؟
قبل ما تقول السؤال التاني : إزاي بتربط تويتر بالفيس بوك !
برضو روح جوجل هتلاقي الإجابة !
دلوقتي أقدر أقولك أهلا بك في تويتر..
عشان بقى تبقى تويتراي صح ! لازم تفهم إنك دخلت في مرحلة جديدة من حياتك
أولا في أغلب الأحيان هتكون مُدمن تويتر .. و هتستخدمه أحيانا في حاجات غريبه
زي مثلا إنك تكون عاوز تروح الحمام .. فتكتب على تويتر عاوز أروح الحمام !
و كأن لما تكتب كده هيجيلك إتنين يشيلوك يودوك الحمام و يرجعوك تاني
!
وأحيانا بتنسى الكلام العادي بتاع البني آدمين ..وبدل استخدام اللسان بتستخدم صوابعك في الكتابة على تويتر
! فممكن تلاقي التكييف بارد فتكتب حد يوطي التكييف شوية
دي أعراض هتحصلك هتحصلك ! بس صدقني مش مهم
المهم إنك تبقى شاب تويتري..أو شاب مزقزق
و التويتري اللي على حق .. يقول للعيال بتوع الفيس بوك ... يعععععع
دي صفة أساسية في أي مستخدم لتويتر .. الفيس بوك يعني " ياااي بييئة خالص " و دقة قديمة
لازم تبص بإحتقار للعيال بتوع الفيس بوك .. !
إيه دا مفيش شات و مفيش نوتس و مفيش ألبومات صور !!
انسى الفيس بوك يا حبيبي !
تويتر .. يعني باباك يعدي من جنبك يلاقيك بتكتب علي تويتر .. فيحط إيده على كتفك و يقولك : ربنا يخليك لمصر ..أنا فخور بيك.
.
تويتر .. يعني مامتك تسيب التلفزيون و الجرايد وتيجي تقعد جنبك و تقولك إيه الأخبار يا حبيبي على تويتر .. في جديد !!
تويتر يعني أوباما .. والبرادعي
بس على فكرة .. أوباما كان قبل ما بيبقى رئيس بيكتب على تويتر آه بس بيعمل مؤتمرات و ندوات و قعدات و مسيرات !
مش مقضيها ليل نهار على تويتر كده !
ها ؟ إنزل الشارع و خف رجلك من تويتر شوية !
تويتر .. يعني تلاقي الأستاذ الصديق الفنان ع س بيعمل هاشتاج و كمان هاشتاج ..ويصدعك بكمان هاشتاج
فيقوم صديقه الأستاذ الفنان م د ..يرد عليه بهاشتاج ..وكمان هاشتاج ..ويديله كمان هاشتاج
فجيرانك يقلولك ايه الدوشة اللي عندك دي
فتقولهم لا لا دا بس العيال قاعدين يلعبوا على تويتر ..!!
فراغ بقا بعيد عنك
وأهو أحسن من الأتاري
تويتر ... يعني كل العالم بيزقزق أي حاجه .. وفي مصر بيزقزقوا سياسة !
سياسة سياسة سياسة ... حتى إنه قرب يسموه التويتر السياسي
تويتر .. يعني شات روووم كبييرة .. و رغي رغي رغي
وكله بيكلم كله
تويتر يعني العيال تلعب .. والصحفين ياخدوا كلامهم ينزلوا به مقالات على المواقع الإلكترونية
تويتر .. يعني بنعمل كل حاجة على تويتر .. شغل و بنشتغل .. لعب و بنلعب .. نوم و بنام .. هلس و بنهلس
تويتر .. يعني تقول : كنا في فصل واحد دايما كنا الأول و التاني , دمنا خفيف و ثقافتنا زي بعض , الناس بتقول إننا توأم في الشكل و الشخصية .. بس أنا ولد و هي بنت .. فهي عندها 10آلاف فلورز..وأنا عندي خمسمية !
تويتر .. يعني تضرب حبايتين ضغط و تربط دماغك كويس ..عشان تستحمل !..إنت راجل يا حسام
تويتر .. يعني الساعة 11 مساءً لما آخر كلام يبدأ على أون تي في ..بتلاقي كل الناس بتكلم يسري فودة على تويتر ..و اللي مش لاقي حاجه يقولهاله بيقوله : سالخير يا يسري
تويتر ..يعني كلنا عيلة واحدة كبيرة سعيدة بنفلو بعض
بس استني اقولك كلمة في ودنك قبل ما اقفل النوت دي
تويتر مش بتاع شأط !..إنسى يا حلو
;)
No comments:
Post a Comment