بكتب جواب ليكي

بكتب جواب ليكي

وأنا فرحان..

فرحان لأني..

هكتب كلام ..

غير الكلام

اللي كنت بكتبه ليكي ..زمان..

وأنا خجلان

بحبك

بحبك !

بحبك وإنتي مظلومة

و احبك وانتي مكلومة

وأحبك بينا منصورة

بحبك وإنت عطشانه

و بعد الري فرحانه

وأحبك وإنتي طهقانه..

و زعلانه

واحبك وإنتي عشمانه

و تاعبه القلب علشانا

و شايله الحب في مشنه

على ضفايرك..

وفوق الشال

جمالك..

تتهزله جبال

وتمشي.. في رجلك الخلخال

يرن في قلبنا.. رنه

بحبك متكحلة عيونك

و أحب سمار كده في لونك

وأحب العزم ..عزم رجال

يصاحبني وانا قاعد ..

وفي الترحال

وأرجعلك أنا في الحال

ما بقدر أعيش من دونك

أيا مصر ..

علينا إتمهلي شوية

صبية .. بتغسل بالنيل شعرها

وتدعك باللمون صدرها

وأتوه فيها كما الصحرا

وسحراني كما السحرة

وتقطع خلوتي خُضرة

على نيلها

وكل الناس تقولها.. هنيالها

بتحسدها.. على الحب اللي شايله في قلبي ليها

واللي متشال في قلوب عيالها

بحبك ضحكتك صافية

وانتي على شط إسكندرية

بتجري حافية

و بتلعبي برجليكي في الرمل

ومش خايفه !

مش خايفه .. من حد يغدر بيكي

ما احنا معاكي .. بروحنا نفديكي

ونسمع غنوتك في المغربية

ياما عشقنا غناويكي

بتترتل

وتسبيحك في وسط الليل

وإحنا وراكي نسترسل

و نسمع في الحُسين قرآنك

كما أنزل

وترنيمة

تخللي القلب يتوسل

عشقنا العشق من عشقك

وشفنا النور في رسمك

وحبينا حروف إسمك

فبسمك بسألك إنك

ماتبعدناش تاني عنك

بحبـــــــك

_____________

قراءة نص كم للنص الشعري

http://www.youtube.com/watch?v=ywE17YcCxUc