رِجــع النظام ..شعر

كنت معصوب العينين

ماشي في الليل لوحدي

كل تفكيري حزين

بس قلبي لسه مؤمن ..

بيكي ..

أرضي

كانت إيديا متكتفه ..

ورا ضهري

و رجليا متكبلة ...

بمليون سلسلة من قهري

بس مهما كان بيحصل ..

كنت بمشي ..

أو حتى بحبي

كنت مظلوم .. ظلم السنين فيكي

كنتي مسروقه ..

و كان كل حاجه فيا ليكي

كان نفسي مرة اشوف نظرة حب صادقة ..

ليا في عينيكي

و لجل دا خرجوا الشباب في النور..

قتلوا الظلام

ضربوا طواحين الذل..

بس ما بطلوا قولة سلام

قالوا يلا للعمل..

و كفاية بقا كِتر الكلام

و بكل حب و أمل ..

هتفوا ..

الشعب يُريد إسقاط النظام

الشعب يُريد إسقاط النظام

نادى المنادي

راح النظام

وقع النظام

فرحت قلوبنا بكل حب ليكي و غرام

دا كل نقطة دم راحت ..

جاي حقها مفهاش كلام

لكن قوام ..

رجع النظام .

* * *

لسه نظام الغدر

و لسه إهانة أبو الشهيد ..

و بيبتروا قلبه بتر

لسه عايزين كل الشباب فيكي خايف

و لسه فيكي دم سايل

و جُرح نازف

و لسه بيقولوا عدالة

و العدل فيكي أمره زايف

و لسه القضا فاتح عينيه و شايف

لسه اللي بيقتلونا فوق السحاب

وإحنا الخطر

و لسه رسايل التخوين

نازله على روسنا زي المطر

لسه ولادك دمهم رايح هدر

لسه بير الذل فيكي ..ماخلصشي

لسه ظابط واقف هناك كفرعون .. مابيتوبشي

بس برضو لسه فيكي ولاد ما بتخافشي

و مهما حاولوا يقهرونا

و مهما حاولوا يخرسونا

لسه هنقول للنظام..

إنه يمشي .. مش هنمشي