رسـالة من شهيـــد

لما إتولدت خدتني أمي في حضنها

وقالت في ودني كلمتين

القدس يا بني ضاعت من سنين

وإنت الولد

نذرتك لجل الأقصى شهيد

فصَرخْت ..

وهي بكت

لما كبرت

شفت العرب ساكتين

وإسرائيل بتقتل ولادهم

وهما مغمضين

عِمْيان...

وغير رضا أمريكا مش عايزين

دمي غلى

وخرجت أمشي في الشوارع

وحبها في قلبي عِلي

وعَلَّىَ جوايا المواجع

فاشتريت كفني و رجعت

شافه أبويا ...

فبص ليا و سكت

قلت لأبويا : سكت ليه؟

مش إنتوا اللي قلتوا شهيد ؟

وأنا مستعد لأجلها ابقى شهيد

بص في عينيا في خجل

قالي يا بني مصر ماتت

ولما ماتت .. مات العرب

وصحيوا الكلاب تنهش في لحمنا بالحي

دهنوا حياتنا بالسواد .. وعمرنا الجَي

وإحنا السبب

سكتنا لمبارك وعيلته

وسبنا جبروته وخيبته

واليوم نقول نجيب فلسطين؟

نجيبها فين ومصر مكتوفة الإيدين؟

من مصر يابني تبدي الحكاية

ترفع رايتها .. تترفع بعدها خلفك ألف راية

سمعت كلمته .. وسكت

وبعدها بيومين

في الفجر كسروا علينا الباب

و من عيونهم وعيون أبويا.. فهمت

وبعد سنين

قالوا تعالي

النهارة مش يوم بلادة

خرجت بدعوة والدتي

وعرفت إنه دا يوم الشهادة

رفعت صوتي

وصلبت عود مصر تقف

وصلبت عودي

وناديت بصوت عاالي

عودي .... عودي

هجموا علينا الهمج

على كل بنت و شاب

زي ما هجموا الهمج

وكسروا علينا الباب

شفت أبويا اللي مات في سجنهم

وشفت عيون أطفال كتير إتيتموا في حكمهم

شفت أمير واقف بخيله

على كوبري قصر النيل

وشفت جنود بيضا

واقفة تصلي ماهمها التنكيل

كنا يوميها أعزة

ومافينا أي ذليل

شفت ملايكة واقفة تصلي

ورا شباب الجيل

قمت و دافعت

لجل الظلم ينتهي

والعدل يرجع يبتدي

كنت عارف إن دا يوم الخلاص

لكنهم فضلوا في غيّهم

وزي كلاب إسرائيل

ضربوا علينا رصاص

خدت رصاصة في قلبي

اللي عمره ما حب غيرك

حَبْك ...

مع إنه شاف الذل فيكي

ولا عمره يوم شاف خيرك

دمي سال

يروي حكاوي عن غلاوتك في القلوب

دمي سال

لجل تكوني فوق الشعوب

دمي سال

لجل تثوري

ولجل ما ترضي ابدا تبوري

دمي سال

فرفعت صباعي بالشهادة

وسلمت روحي

بعد ما شافت جنتي

دمي سال

فكفنوني بكفني الأبيض

و أمي مبتسمة و واخدة راسي في حضنها

باست جبيني وغرقتني بدمعها

ولما شالوني فوق كتافهم

قلت ليهم :

أنا دمي سال من أجلكم

من أجل نصر

فاوعوا تخونوا الدم

وتخذلوني

أو تخذلوا مصر

ولما دخلت القبر

دمي سال تاني من جرح غائر

و بلون دمايا

على كفني وعلى أرض بلدي

كتبت إسمك

كتبت ... مصر

بالصوت

http://www.youtube.com/watch?v=jmf-n68-_jc