المعركة الأخيرة. شعر.

المعركة حامية..
و الدنيا بعد ما نوَّرت..
غايمة..
و الفتنة صحيت..
بعد اما كت نايمة..
و الناس اللي عايشه..
بتعدي في بحور الدم عايمة.

المعركة دامية..
دم الحسين إتهدر ..
و اللي اتقتل عمر..
خلوا الحياة مشرحة..
و قلوب صبايا ..
م الوجع متشرَّحة..
و عيال طلعت الصبح..
و مش مروّحة..

و الدم ع الطرحة..
بإيدين قلوب كالحة..
خرطوش..
و حي..
و غاز بيخنق..
و مدرعة..

المعركة الأولى..
خاضها محمد علي..
و المعركة التانية..
رجعوا المماليك..
ينتقموا مننا..
إحنا الصعاليك..
إحنا تراب الأرض..
إحنا دانة المدفع..
إحنا البردانين في الدفا..
إحنا ركية الشاي ساعة الصفا..

رجعوا المماليك ينتقموا منننا..
منعوا الغنا..
منعوا الأماني الممكنة..
و ولاد الزواني..
اتعلموا فينا الزنا..

المعركة حاسمة..
أصل القتيل إتقتل..
و وَّقفوا الزمن..
و الظلم بقى ظلمات..
و الكره فيه إتشحن..
و الجنرال خان..
و كل شيء بان..
هما جايين يقتلوك..
إسبق بخطوة..
وحطهم في الكفن..
المعركة لازمة