أبكي ..
وكل الأرض ورايا تبكي
والبسمة مرسومة على وش القمر
وأنا شايف من بعيد جايه شمسي
و دموع ولادك وسط البسمة تنزل
و سط مياه النيل بتجري
تروي ميادينك ميدان ميدان
و تروي أرضي
صرخت صبية مات أخوها
و امه صرخت
لجل دا مات الشهيد
دمه سال على أرضه يشهد
تصرخ بحزن لجل دمه
و بفرحة تصرخ تاني أمه
مات ولدها
وفي يوم مماته .. مصر رجعت
رقصوا ولاد النيل ..ولادك
إحتفال بيوم ميلادك
جبنا حقك م اللي سرقك
و الأغاني الحلوة شغالة في نورك
كانت حزينة زمان
و كلماتها مقهورة
رجعت أغاني زمان
باللحن منصورة
في كل بيت و في كل شارع
و في التحرير .. في الميدان
جايه مظبوطه ..في الأوان
أمواج كتيره من البشر
ما خلاص ...الشعب إنتصر !
الشعب إنتصر !
شوفوا يا عالم وإسمعوا
أهل مصر دفعوا كل غالي
و كانوا مستعدين تاني يدفعوا
لجل حرية الإنسان
في أي مكان
وأي زمان
و دا شعار راح نرفعه
زغروطة طلعت من بنت حلوة
شايله علم
ياما صابنا الحزن فيكي
بس بجد الفرحة حلوة
فيها دفا .. فيها عشم
و النهارده فرحنا بينا
وفرحنا ليكي
و كتبنا تاني في التاريخ
حتما و لازم
لكل ظالم نهاية
يجني فيها ما ظلم
No comments:
Post a Comment