قوم يا شيخ و قول كلامك
و عيد و زيد
ماحنا جنابك كلنا في عصر جديد
عصر جابه ربنا بإيد الشباب
و حضرتك كنت بعيد
و للمفاجأة ..
لسه جوا البعض فينا .. عبيد
قوم يا شيخ
ليك إحترامك
يوم ما هتف بالحق المبين الناس
و إنت فضيلتك ع الشباب و الحق داس
زي ما كنا واقفين للظلم راس براس
اتعاملنا كأننا أي مداس..
ينداس
قوم يا شيخ قول كلمتينك
قول الحق هو دينك
و إن رب العالمين
بينا و بينك
إدعي برضو و احنا نقول آمين
بس الدعا من غير عمل
تيجي استجابته منين ؟
مش دا كلام الدين ؟
قوم ياشيخ
دا انت مقامك عالي
زي ما عليت مطالبنا
و انت ساكت أو موارب بابك
أو مثبط عزيمتنا
قوم معانا زي اللي قاموا
قول بإنك كنت لابس كاجوال و متخفي وسط الجموع
وإنك زي الحضور هتفت ضد الظلم و ضد الجوع
و إنك لما الشهيد إرتفع
إئدت معانا شموع
قوم يا شيخ و قول
الثورة دي ثورتي
و القعدة في البيت
مش غلطتي
و كل الكلام اللي قلته إمسحه
و قول ولا اعرفه ولا كلمتي
قوم يا شيخ .. و غيَّر في الشعار
قول شعارنا دا - أستغفر الله العظيم - إنهيار
و إن شعاركم لازم .. مش خيار
و لولا دعاكم في البيوت
مع إن كل الدنيا على كلامكم كانوا شهود
كنا غرقنا في البحار
و لعمر ما كان بان لثورتنا نهار
و انتوا اللي قدتوا الثورة بكل إقتدار
و ادي الحكاية و اللي صار
شيخ بيقول الثورة نار
بس في قلبه بيدعي ليها
و بيقول الثورة للجنة دار
يادي العار !
يوم ما كل الناس شجعونا
و انت يا شيخ بعتنا
يوم ما كل الناس وقفوا معانا
وانت بطيب كلامك خوفتنا
يوم ما كل الناس ثبتونا
وإنت خذلتنا
روح يا شيخ صلي ركعتين
وإقف ورانا من غير مكابرة ..
أو مزايدة
يمكن يتوب عليك ربنا
No comments:
Post a Comment