اللي مات..
مامتش عشان جسمه مات!! ..
دا مات لما صحيت كل البشر
وقلبه دون الخلق مات...
فياللي بتقولوا آسفينلك ياريس
التحرير صحى البشر
وإنتوا لسه عايشين في اللي فات
و في اللي مات
قالوا يعني نكون ناكرين للجميل !
و ننسى بطولات الطيار الأصيل
اللي حارب إسرائيل ؟
يا أعمى البصيرة !!
حارب إسرائيل
و موّت مننا بعدها ناس كتير
بيورث فينا المرض
من جيل لجيل
طب فاكر عبالعاطي الشجاع؟
اللي كان وسط الدبابات..
أسد ..وسط الضباع !
حارب كما الأبطال في سينا
و لما جه يوم الممات
مات بفيرس سي ..
مجهول في بيته ..فقير
و حتى يمكن ساب ولاده جياع
و غيره م الأبطال كتير
حاربوا اليهود .. واتنسوا
و إداس عليهم
بس عمر ما مصري مات
من طلقة طلعت
من إيديهم
أما مبارك
اللي جنباكم بتقدموله الأسف
فرّق ما بين الأب وإبنه ..
في السجون
ونسينا ..وخلى ولاده
هما كل الكون
و قطع لسان البلبل لما نطق
ومنع العصافير تغرد ع الغصون
ولما ضرب علينا النار
كان بينشن في العيون
وإنتوا تيجوا تقدموله الأسف !!
يالا السخف !
No comments:
Post a Comment